Скопје мора да се гради, кај „Бристол“ ќе никнат 2 нови згради

Поттикнат од негодувањата на граѓаните на општина Центар кои се против изградбата на двете административни згради и катната гаража во близина на хотел Бристол, градоначалникот Владимир Тодоровиќ излезе со изјава дека планираните градби се дел од урбанистичкиот план „Голем ринг - исток“.

-Сите згради ќе бидат исклучително естетски поставени и ќе бидат функционални. Дека ќе има негодувања од мал број луѓе ќе има, затоа што им се менува микро локацијата, но ние ќе постапиме со сите стандарди и правила на урбанистичкото проектирање. Градот мора да се гради и на таа локација ќе никнат две прекрасни згради, кои ќе си ја вршат својата функција, вели Тодоровиќ.

Тодоровиќ рече дека не сака да помисли оти опозицијата ова ќе го злоупотреби и ги повика граѓаните на трпение додека се изведуваат градбите.

Градоначалникот Коце Трајановски истакна дека Градот Скопје има одлична соработка со општина Центар за сите проекти кои се во интерес на граѓаните. Трајановски потенцираше дека имало негодување од страна на граѓаните и за булеварите Илинденска и Климент Охридски, Градските плажи, како и многу други проекти, но на крајот сите проекти беа широко прифатени од скопјани.

- Се градат булевари, згради, се обновуваат мостови, се градат мостови, фасади, плажи на Вардар. За многу проекти кои се почнати имаше скептицизам и недоверба кај граѓаните дека не се оправдани, дека нема да бидат добри за граѓаните во Скопје, меѓутоа праксата покажа дека со секој завршен проект граѓаните многу добро го прифатија и ги сметаа за успешни, истакна Трајановски.

Тој додаде дека и натаму ќе се продолжи со градење и развивање на градот Скопје, кој треба да се извади од стереотипот кој беше досега.

Урбанистичкиот план предвидува изградбата на две нови згради со висина до 29 метри во паркот спроти хотелот „Бристол“, наменети за државната администрација, катна гаража кај „Автомакедонија“, а на местото на Зелено пазарче има маркица за зелена површина и место за спорт и рекреација.

Видеото е превземено од првата македонска интернет телевизија Македонија24.
Превземањата се во согласност со условите пропишани од Македонија24.