УСАИД (Програма за основно образование) преку Проектот за основно образование (ПЕП) ќе вложи 1.500.000 денари за да ги замени сите прозорци во најстарото училиште во Струмица ООУ “Маршал Тито“ со нови ПВЦ прозорци и надворешни врати, со кои ќе се обезбедат подобри услови за настава во оваа училиште.

Во кабинетот на градоначалникот на општина Струмица беше потпишан Меморандум за соработка помеѓу Општина Струмица, УСАИД – Проект за основно образование и ООУ “Маршал Тито“.

Меморандумот го потпишаа градоначалникот Зоран Заев, Лири Старова од УСАУД Проект за основно образование и Снежана Колева, директор на ООУ “Маршал Тито“ Струмица.“Работата на ПЕП е базирана на соработката со општините и училиштата. Огромна поддршка добиваме и од училишните одбори и советите на родители, но и наставниците и родителите помагаат во имплементацијата на проектите и во процесот на создавање на подобра средина за учење на децата.

Овие реновирања не се само естетски, туку овозможуваат подобри услови за настава и учење, ги намалуваат трошоците за греење и не ја загадуваат животната средина. Училиштата во кои сме работеле велат дека им се намалени трошоците за греење и на тој начин се заштедени пари кои можат да бидат искористени за други цели“ – ни изјави Лири Старова, координатор на ПЕП проектот. Покрај инвестицијата на ПЕП проектот од страна на УСАИД, општина Струмица ќе учествува со свои средства во висина од 10%, а ООУ “Маршал Тито“ ќе учествува преку работна рака на родителите и вработените, односно со одстранување на старите прозорци.